【人情】
今日同老友記開精神健康小組，講到日常生活壓力，一位76歲獨居伯伯坦白分享：
「我係政府養嘅，每月生活慳慳埋埋都叫做啱啱夠，但一聽到紅白二事壓力就好大！唔去都要俾人情㗎！一俾又要俾幾百！好似幾個月前，我伯娘喺澳門嫁女，我同佢關係好好，唔去又唔好意思，結果，人情俾咗五百、船飛三百幾！我已經唔係住酒店，住賓館客棧嗰類，一晚二百幾，加埋買咗少少嘢，咁就冇咗千幾蚊！真係好肉痛！最勁嗰次我一個月收兩單紅，一單白嘅，所以我一聽到紅白二事就好大壓力！」
平時主要關注老友記日常生活嘅我，頃刻如夢初醒，原來一啲咁樣嘅事，會帶俾老友記咁大嘅經濟同精神壓力！大家如果有認識嘅長者真係要多加體諒！